Jurnalistikaya maraq onda hələ uşaq yaşlarından yaranmışdı. Zabitdə bu marağı atası Cəmşid müəllim oyatmışdı. İxtisasca
müəllim olan, maarif sahəsində səmərəli fəaliyyətinə görə “Əməkdar müəllim”, “SSRİ maarif əlaçısı” fəxri adlarına layiq
görülən Cəmşid Xəlilov Qərbi Azərbaycanda bir sıra məsul vəzifələrdə çalışanda da; müəllim, məktəb direktoru kimi təhsil sistemində
fəaliyyət göstərəndə də mətbuatdan ayrılmamış, həm də uzun illər sırf mətbuat sahəsində çalışmışdı.

Dövrünün ən nüfuzlu mətbuat xadimlərindən biri kimi Ermənistan KP MK-nın orqanı olan “Sovet Ermənistanı” qəzetinin xüsusi müxbiri, Basarkeçər rayon Partiya Komitəsinin orqanı olan “Bolluq uğrunda” qəzetinin redaktor müavini, nəhayət
Politexnik institutunun filialında (indiki Azərbaycan Texnologiya Universitetində) “Texnoloq” qəzetinin yaradıcısı olan
Cəmşid müəllim Həsən bəy Zərdabi, “Qızıl qələm” media mükafatları laureatı, Azərbaycan Yazıçılar və SSRİ Jurnalistlər
Birliyinin üzvü idi.
Atasının müxbirlik fəaliyyəti və ümumiyyətlə fəal həyat mövqeyi (Cəmşid müəllim harada işləyir işləsin özünün haqsevərliyi,
prinsipiallığı, nöqsanlara qarşı barışmazlığı ilə fərqlənirdi) Zabitin gələcək həyat yolunu işıqlandıran mayak olmuşdur.
Beləliklə, Zabit kiçik yaşlarından ətraf aləmlə, cəmiyyət həyatı ilə maraqlanır, onu əhatə edən mühitdə cərəyan edən hadisələrə biganə qala
bilmirdi. Xəlilov Zabit Cəmşid oğlu 30 mart 1959-cu ildə Göyçə gölünün nəğməli sahillərində Basarkeçər rayonunun Kiçik Məzrə kəndində dünyaya göz açmış, məktəb illərində aşıq poeziyasına, dahi el sənətkarı Aşıq Ələsgərin, Aşıq Alının yaradıcılığına böyük maraq göstərmiş, xalqımızın əxlaqi sərvətlərini, mənəvi dəyərlərini, adət-ənənələrini öyrənmiş, Göyçənin atlas geyimli dağları,
düzləri, qayaları, şərbət bulaqları, çöllərin ətri, təravəti, gözəlliyi onun diqqətini cəlb etmişdir.
Yeni nəşr olunan roman, povest və hekayələr orta məktəbdə təhsil aldığı illərdə heç vaxt Zabitin əlindən düşməzdi. Yeni kitabları o,əl-əl gəzər, tapar, xəyalında hər vaxt oxuduğu əsərlərin qəhrəmanları canlanar, humanitar elmlərə sonsuz maraq göstərərdi.
1969-cu ildən “Azərbaycan pioneri”, “Azərbaycan gəncləri” qəzetlərində ilk məqalələri dərc olunanda onun cəmi 10 yaşı var idi. 1975-ci ilin
14 martında Ermənistan Maarif Nazirliyinin və Həmkarlar Komitəsinin elan etdiyi inşa yazı müsabiqəsində I yeri tutub, “Sosializm yarışının qalibi” medalı ilə təltif olunanda isə 16 yaşlı Zabiti artıq gənc müxbir kimi tanıyırdılar.
Onun imzası “Azərbaycan pioneri “ və
“Azərbaycan gəncləri” qəzetlərində daha tez-tez görünürdü. Gah məqalə, gah da şeirlə mətbuatda çıxış edən Zabit dərslərini dəyaxşı oxuyurdu.
Orta məktəbi əla qiymətlərlə bitirib H.Zərdabi adına Kirovabad Dövlət Pedaqoji İnstitutuna (indiki Gəncə Dövlət
Universiteti) daxil oldu. Tələbəlik illərində institutun çoxtirajlı “Yüksəliş” qəzetinin fəal ştatdankənar müxbirlərindən biri oldu. 1981-ci ildə institutu “fərqlənmə” diplomu ilə bitirərək, müstəqil əmək həyatına atılan Zabit addım-addım, pillə-pillə yüksəldi. Əvvəl Daşkəsən
rayon Komsomol Komitəsində komsomol katibi, sonra Gəncə şəhər Komsomol Komitəsində şöbə müdiri, daha sonra Azərbaycan LKGİ MK-nın Beynəlxalq Gənclər Turizm bürosunda şöbə müdiri, 1991-1995-ci illərdə Gəncə şəhər İqtisadiyyat Mərkəzində şöbə
müdiri oldu.
O, Azərbaycan KP MK yanında Ali Partiya məktəbinin “partiya quruculuğu fakültəsini (1987) və Azərbaycan Politexnik
İnstitutunu (1991) bitirdi. Təşkilati işlərlə yanaşı, o, müxbirlik fəaliyyətini də “Daşkəsən” qəzetində davam etdirirdi. Daşkəsəndə işləyərkən “Daşkəsən” rayon qəzetinin nəzdində “Gənc müxbirlər” məktəbini bitirməsi onun bu sənətə daha çox professionallıqla
yanaşması ilə nəticələnirdi. Sonra bir müddət (1995-2013) Zabit daha bir məsul vəzifəyə irəli çəkildi. Gəncə şəhəri Nizami Rayon
İcra Hakimiyyətində Fövqəladə Hallar və Mülki Müdafiə Qərargahının rəisi vəzifəsini müvəffəqiyyətlə yerinə yetirən I dərəcəli dövlət qulluqçusu Zabit Xəlilovun əməyi bu illərdə dəfələrlə Gəncə şəhər Nizami Rayon İcra Hakimiyyətinin başçısı və Fövqəladə Hallar
Nazirliyinin Gəncə Regional FH və MM şöbəsinin rəis tərəfindən “Fəxri fərman”lar və qiymətli hədiyyələrlə mükafatlandırıldı.
Və nəhayət, 2013-cü ildə Zabit yenidən öz sevimli sənətinə - jurnalistikaya qayıtdı. Əslində, yuxarıda qeyd etdiyimiz kimi, o,
uşaqlıqdan vurğunu olduğu bu sənətdən heç ayrılmamışdı. Sadəcə, indi o, ölkənin ən məsul jurnalist postlarından birini tutdu.
“Respublika” qəzetinin Gəncəbasar bölgə müxbiri təyin olundu. Zabit Xəlilovun bölgə müxbiri kimi əsas vəzifəsi respublikanın 8rayonunda baş verən ən mühüm hadisələr, xüsusilə rəsmi dövlət orqanlarının həyata keçirdiyi tədbirlər, təşkil etdiyi müxtəlif iclaslar, konfranslar və s. haqqında rəsmi xəbərlər hazırlamaqdır. İstər kiçik olsun, istər böyük - hər bir yazıda operativlik, şəffaflıq,
obyektivlik meyarlarına əməl etmək Zabitin jurnalistlik fəaliyyətinin əsas xüsusiyyətidir.
Ancaq zəngin araşdırmalar aparıb, müşahidə
etdiyi hadisə və insanları təhlil (analiz və sintez) süzgəcindən keçirən bu peşəkar jurnalistin yazıları rəsmiyyət çərçivəsində qalmır.
Onun müxtəlif peşə adamları barədə yazılmış oçerkləri, portret cizgiləri də maraqla oxunur.          O, gah ürəkdə qeyri-adi ustalıqla sonsuz sayda açıq əməliyyatlar aparan məşhur cərrah Vüqar Qapaqovun, yalnız ölkəmizin deyil, dünya aqrar elminin inkişafına töhfələr verən professor Xalid Qurbanovun şərəfli əməyindən heyranlıqla söz açır; gah Gəncənin ən qabaqcıl məktəblərində görülən möhtəşəm işləri, gah sahibkar qadınların sahibkar kişilərdən heç də geri qalmayan işlərini işıqlandırır; gah da onun qələminin obyekti öz işinin ustası olan sadə peşə adamları, məsələn 89 yaşlı məşhur saatsaz Sabir dayı, yaxud poçtalyon Faiq olur. Bəzən də dünyanı tərk etmiş yaxşı insanlar (Bilal Verdiyev, Etibar Xəlilov və b.) haqqında kövrək yazıları oxucuları göz yaşına qərq edir.
Jurnalist peşəsinin incəliklərini dərindən mənimsəmək, yaxşı jurnalist olmaq üçün daim öz üzərində işləməli, biliklərini
təkmilləşdirməlisən.

Bu həqiqəti bilən Zabit Xəlilov da Azərbaycan mətbuatını ardıcıl izləyir, öz zəngin mütaliəsi ilə seçilir, qələmini
müxtəlif janrlarda sınayır; yazılarını janrından asılı olaraq rəsmi müxbiri olduğu “Respublika” qəzeti ilə yanaşı, digər mətbuat
orqanlarında da (“Rüzigar”, “Elin səsi” və s.) dərc etdirir. Gəncə və Gəncəbasarda baş verən elə bir hadisə, qazanılan elə bir nailiyyət yoxdur ki, Zabitin iti və püxtə qələmindən uzaq düşsün. Zabit daim arayır, nə isə aşkara çıxarır, yazır-yaradır. Məhz bu yorulmaz axtarışları, məhz bu gözəçarpan nailiyyətləri ona - 1995-ci ildən Azərbaycan Jurnalistlər Birliyinin üzvü olan Zabit Xəlilova iki yüksək media mükafatını - 2011-ci ilin fevralında H.Zərdabi adına, 2013-cü ilin aprelində isə “Qızıl qələm” mükafatları laureatı adını qazandırmışdır.
Zabit yalnız publisistika sahəsində işləməklə kifayətlənmir. Uşaqlıq, ilk gənclik illərindən poeziya da onun daimi yol-yoldaşıdır.
Həyata obrazlı baxışın poetik ifadəsi olan şeirləri iki kitabda toplanmışdır: “Mənim dünyam” və “Özümə arzum”.
“Özümə arzum” şeirindəki:
İstərəm yazılan qalam, ömrümün
Şərəflə keçirəm hər bir gününü.
Qarğatək mənasız yaşamaqdansa,
Şahintək zirvədə görəm özümü, -
fikri, yəni mənalı ömür sürmək istəyi Zabit Xəlilovun həyat amalıdır deyə bilərik.
Bu amalı, bu istəyi o, öz övladlarına da aşılamışdır. Yazının əvvəlində Zabit Xəlilovun atası Cəmşid müəllimdən söz açmışdıq.
Atasından qəbul etdiyi həyatı mənalı keçirmək; əməksevər, vicdanlı və məsuliyyətli olmaq keyfiyyətləri estafetini
Zabit öz övladlarına da ötürmüşdür.
Gəncə Şəhər Baş Polis İdarəsində tabor komandiri olan böyük oğlu Elvin də, dövlət qulluqçusu olan kiçik oğlu Elnur da, Təcili Tibbi Yardım Stansiyasında işləyən qızı Mələk də atalarına layiq övladlardır.
Zabit Xəlilov “Respublika” qəzetində bölgə müxbiri kimi işlədiyi 7 il ərzində xeyli sayda aktual və maraqlı məqalələri dərc edilmişdir.
Onun digər mətbuat orqanlarda çap olunan yazılarını da bura əlavə etsək, bu şəxsin nə qədər zəhmətsevər bir insan olduğu aşkara
çıxar.

İşinin kəmiyyəti də, keyfiyyəti ilə qoşa addımlayan, çalışdığı hər bir işdə əsgər kimi intizamlı, zabit kimi məsuliyyətli olan Zabit
Xəlilovu 66 yaşı münasibətilə təbrik edir, şərəfli işində və bütün həyatında uğurlar arzulayır, daim qələminin iti, sözünün
kəsərli olmasını arzu edirik.            

 @ Patriot News. az