Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi və “Gələcək Naminə” Vətəndaş Cəmiyyətinin İnkişafına Dəstək İctimai Birliyinin təşkilatçılığı ilə “Qarabağ 360” layihəsi çərçivəsində Gəncə şəhəri Kəpəz Bələdiyyəsində görüş keçirilib.

Patriot News.az xəbər verir ki. tədbirdə Gəncə şəhər Kəpəz Bələdiyyəsinin sədr müavini Elşad Məmmədov çıxış edərək layihənin əhəmiyyətindən bəhs edib və onun uğurla icra olunması ilə bağlı arzularını ifadə ediblər. Daha sonra “Gələcək Naminə” İctimai Birliyinin sədri Tural İsaqov layihə haqqında ətraflı məlumat verib.

Layihənin əsas məqsədi virtual reallıq (VR) texnologiyalarından istifadə edərək işğaldan azad olunmuş ərazilərin mövcud vəziyyətinin rəqəmsal arxiv bazasını formalaşdırmaq və bu məlumatları gələcək nəsillərə ötürməkdən ibarətdir. Bu çərçivədə işğaldan azad edilən bölgələrə ekspedisiyalar təşkil olunub, həmin ərazilərdə dağıdılmış infrastruktur və tarixi abidələrin VR texnologiyası vasitəsilə sənədləşdirilməsi həyata keçirilib. Nəticədə 360 dərəcəlik VR görüntülər hazırlanaraq müvafiq platformalara inteqrasiya edilib və ictimaiyyətə təqdim olunub.

Tədbir zamanı iştirakçılar VR eynəkləri vasitəsilə işğaldan azad edilmiş ərazilərə virtual səyahət edərək erməni vandalizminin fəsadlarını canlı şəkildə müşahidə ediblər.

Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi tərəfindən maliyyələşdirilən “Qarabağ 360” layihəsi çərçivəsində əldə edilən materiallar gələcəkdə müxtəlif platformalarda yayımlanacaq və beynəlxalq ictimaiyyətin diqqətinə təqdim olunacaqdır.