Son illərdə Gəncə şəhərində yenidənqurma və abadlaşdırılma işləri geniş vüsət alıb. Şəhərin daha təmiz, daha müasir və daha yaşıl olması üçün mühüm addımlar atılır. Bu çərçivədə tullantıların idarə olunması və şəhərin təmiz saxlanması məqsədilə müxtəlif tədbirlər həyata keçirilir. Lakin bütün bu səylərə baxmayaraq, bəzi yaşayış məntəqələrində hələ də köhnə vərdişlər və məsuliyyətsiz davranışlar hökm sürür.

Məsələn, şəhərin Bayan küçəsində yerləşən xanarx bu mənfi tendensiyanın bariz nümunəsidir. Sakinlərin bir qismi zibil qablarından istifadə etmək əvəzinə, məişət tullantılarını xanarxın məcrasına atmağı vərdişə çevirib. Bu məsuliyyətsizlik təkcə ərazinin görünüşünü eybəcərləşdirmir, həm də ciddi ekoloji və ictimai fəsadlar törədir. Zibillə dolu su axarı tıxanır, nəticədə xanarxın məcrası daşır və ətraf əraziləri basır. Nəticə etibarilə həm ərazi zibillə örtülür, həm də çirkab su insan sağlamlığı və ətraf mühit üçün təhlükə yaradır.

Bu mənzərə həm tənqidə, həm də dərindən düşünməyə səbəb olur. Gəncə sakinləri, xüsusilə Bayan küçəsinin əhalisi başa düşməlidir ki, tullantıların küçələrə, çaylara və xanarxlara atılması nəinki şəhərin gözəlliyini pozur, həm də onların özlərinin sağlamlığını təhlükə altına atır. Çirkab sular müxtəlif xəstəliklərin yayılmasına səbəb ola bilər, ekosistemin məhvinə yol açar. Üstəlik, tullantıların idarə olunması yalnız bələdiyyənin və ya müvafiq qurumların işi deyil – hər bir vətəndaşın borcudur.

Əgər biz daha təmiz, sağlam və yaşana bilən Gəncə görmək istəyiriksə, məsuliyyəti yalnız başqalarının üzərinə atmaqdan vaz keçməliyik. Tullantıları zibil qabına atmaq, ətraf mühiti qorumaq, təbiətə dəyər vermək bizim hər birimizin vətəndaşlıq borcudur. Uşaqlarımıza örnək olmaq üçün, gələcək nəsillərə daha gözəl bir şəhər miras qoymaq üçün bu kiçik, amma vacib addımları atmaq lazımdır.

Gəlin birlikdə bu problemi aradan qaldıraq və Gəncəni daha təmiz, sağlam və gözəl bir şəhərə çevirək!

Müəllif:
Rəfi Əliyev