3 iyun 2025-ci il tarixində Azərbaycanın tanınmış yazıçısı, rəssamı, filosofu və ictimai xadimi, filologiya üzrə fəlsəfə doktoru Maya Bədəlbəyli dünyasını dəyişdi. Onun vəfatı Azərbaycan ədəbi və mədəni həyatında böyük bir boşluq yaratdı.

Maya xanım 1952-ci ildə Bakı şəhərində anadan olmuş, Bakı Slavyan Universitetində təhsil alaraq filoloq və sosioloq kimi formalaşmış, daha sonra fəlsəfə elmləri sahəsində elmi fəaliyyət göstərmişdir. O, özünün intellektual və yaradıcılıq potensialı ilə Azərbaycan və Rusiya mədəniyyət məkanında silinməz iz qoymuşdur.

Azərbaycan Yazıçılar Birliyinin, Rusiya Yazıçılar İttifaqının, Azərbaycan Rəssamlar İttifaqının və İnformatizasiya Akademiyasının üzvü olan Maya Bədəlbəyli, həm də Moskvada fəaliyyət göstərən “Şəhriyar” ədəbi-mədəni cəmiyyətinin fəal üzvü idi.

Onun ədəbi yaradıcılığı dərin fəlsəfi və mənəvi məzmunu ilə seçilirdi. “Dialoq”, “Kainatın Səsləri”, “Rezonansa düşən dalğa mənəm”, “Özünü müqəddəs adlandıran kimdir?” kimi əsərləri oxucunu təkcə poetik baxımdan deyil, həm də ruhani və kosmik düşüncəyə yönəldirdi. Maya xanım 1994-cü ildən sonra öz ruhani təcrübələrini və kainatdan aldığı informasiyaları bədii şəkildə ifadə edərək oxucularını yeni dünyagörüşünə dəvət etmişdi.

Eyni zamanda istedadlı rəssam olan Maya xanımın 250-dən çox əsəri Bakı və Moskvada keçirilən şəxsi sərgilərdə nümayiş etdirilmiş, onun sənətinə həsr olunmuş “Televernisaj” və “Maya” adlı filmlər ictimaiyyətə təqdim olunmuşdur.

O, Azərbaycan mədəniyyətinin sədaqətli keşikçisi, ruhən dərin, ziyalı və işıqlı bir insan idi. Onun ardınca qalan ədəbi və sənət irsi, ruhani axtarışlarla dolu dünyası gələcək nəsillər üçün tükənməz bir qaynaq olaraq yaşayacaq.

Maya Bədəlbəylinin xatirəsi onu tanıyanların, sevənlərin və qiymətləndirənlərin qəlbində daim yaşayacaqdır.

Allah rəhmət eləsin.
Ruhu şad, məkanı cənnət olsun.

Ceyhun Əliyev