Azərbaycan futbolunda bu günlərdə baş verən qəribə hadisə ictimaiyyətin diqqət mərkəzindədir. 10 iyun tarixində "Kəpəz" klubunun yeni baş məşqçisi Adil Şükürovun təqdimat mərasimi keçirildi. Ancaq təqdimatın özü qədər, onun harada keçirilməsi də geniş müzakirələrə səbəb olub.

Azərbaycan futbol tarixinin köklü klublarından biri olan, Gəncə şəhərinin simvoluna çevrilmiş "Kəpəz" klubunun baş məşqçisinin təqdimatı nə az, nə çox – məhz Bakıda baş tutub. Klubun doğma şəhəri olan Gəncə və onun futbol azarkeşləri isə bu qərarı anlaşılmazlıqla qarşılayıb.

Sual: Niyə Bakı?

Əvvəla, "Kəpəz"in Gəncədə özünün bazası, stadionu və hazır infrastrukturu mövcuddur. Klubun yeni baş məşqçisinin təqdimat mərasiminin doğma şəhərdə deyil, paytaxtda keçirilməsinin səbəbi rəsmi olaraq izah olunmayıb. Ən təəccüblüsü isə odur ki, tədbirin hansı məkanda keçirildiyi barədə də ictimaiyyətə məlumat verilməyib. Həmçinin, təqdimatda media nümayəndələrinin iştirak etməməsi, tədbirin demək olar ki, qapalı keçirilməsi vəziyyəti daha da müəmmalı edir.

Klub rəhbərliyi - icraçı direktor Fərman Əlizadə və idman direktoru Erkin İbrahimov tərəfindən təşkil olunan bu təqdimat, əslində, Kəpəzin dəyərlərinə və ənənələrinə ciddi zərbə kimi qiymətləndirilir. Gəncə şəhərinin yüz illərlə formalaşmış futbol mədəniyyəti var. Kəpəz bu şəhərin fəxridir, simvoludur. Bu cür addımlar klubun Gəncə ilə bağlarını zəiflətmək cəhdi kimi görünür.

Bənzər Ssenari Bakı üçün Təsəvvür Olunsa…

Gəlin, məsələni bir az da geniş düşünək: Əgər "Neftçi" klubunun baş məşqçisinin təqdimatı Gəncə şəhərində keçirilsəydi, Bakı azarkeşləri buna necə reaksiya verərdi? Şübhəsiz ki, bu addım həm "Neftçi" azarkeşləri, həm də futbol ictimaiyyəti tərəfindən sərt tənqid olunardı. Çünki klubun kimliyi onun şəhəri, tarixi və azarkeşləri ilə formalaşır.

Bu baxımdan "Kəpəz"in baş məşqçisinin Bakıda təqdim edilməsi, əslində, Gəncə azarkeşlərinə "sizi nəzərə almırıq" mesajı kimi anlaşılır. Belə olan halda ortaya haqlı suallar çıxır:

Klub rəhbərliyi bu qərarı hansı əsasla verib?

Gəncənin futbol ictimaiyyətinin fikri niyə nəzərə alınmayıb?

"Kəpəz" doğrudanmı paytaxta köçürülmək niyyətindədir?

Klub Kimindir?

Kəpəz sadəcə bir klub deyil — o, Gəncənin simvolu, minlərlə azarkeşin həyatının bir parçasıdır. Son illərdə klubun idarəçiliyindəki qərarlar, Gəncənin rolunun arxa plana keçirilməsi, qərarların qapalı və şəffaflıqdan uzaq şəkildə verilməsi artıq ciddi narahatlıq yaradır. Bu gün baş məşqçinin təqdimat mərasimi ətrafında yaranan qalmaqal əslində daha geniş bir problemin simptomudur: klubun idarəçiliyində Gəncənin, onun azarkeşlərinin və futbol ənənəsinin kənarda saxlanması.

Azarkeşlər və futbol ictimaiyyəti isə haqlı olaraq cavab gözləyir: bu klub kimindir – Gəncəninmi, yoxsa bir neçə məmur tərəfindən idarə olunan şəxsi maraq qruplarının?