Son zamanlar Gəncə şəhərində məktəblilər arasında qanunpozuntularının artması cəmiyyətdə ciddi narahatlıq doğurur. Təəssüf doğuran haldır ki, qədim və zəngin tarixə malik, Azərbaycanın elm, mədəniyyət və vətənpərvərlik mərkəzlərindən biri olan Gəncədə bu cür neqativ hallar qeydə alınır. Mütəxəssislər və ictimaiyyət nümayəndələri bu problemin əsas səbəblərindən biri kimi ailədə və məktəblərdə tərbiyəvi işin zəif aparılmasını göstərirlər.

Tərbiyəvi fəaliyyətin zəifləməsi, məktəblərdə şagirdlərlə fərdi işin lazımi səviyyədə qurulmaması, həmçinin valideyn nəzarətinin zəifliyi azyaşlıların hüquqazidd davranışlara meyil etməsinə səbəb olur. Digər tərəfdən, polis orqanlarında azyaşlılarla işləyən əməkdaşların da öz fəaliyyətlərində kifayət qədər effektiv olmamaları bu vəziyyəti daha da ağırlaşdırır. Profilaktik tədbirlərin və maarifləndirici görüşlərin yetərincə keçirilməməsi nəticəsində məktəblilərin bir qismi hüquqi məsuliyyətin fərqində olmadan cəmiyyət üçün təhlükəli yollara yönəlirlər.

Prezident İlham Əliyev çıxışlarında dəfələrlə hüquq mühafizə orqanlarının qarşısında gənclərlə bağlı xüsusi tapşırıqlar qoymuşdur. Dövlət başçısı bildirib: “Biz gənclərimizi vətənpərvərlik ruhunda böyütməli, onların cəmiyyətə faydalı fərdlər kimi formalaşması üçün həm ailədə, həm məktəbdə, həm də bütün dövlət qurumlarında ciddi iş aparmalıyıq.”

Bu çağırış bir daha göstərir ki, gənclərin düzgün tərbiyəsi təkcə məktəbin və ya ailənin yox, bütövlükdə cəmiyyətin və dövlətin prioritet məsələlərindən biridir. Gənc nəsil bizim sabahımızdır və əgər bu gün onların tərbiyəsinə laqeyd yanaşsaq, sabah cəmiyyət olaraq daha böyük təhlükələrlə üzləşə bilərik.

Gəncədə baş verən bu cür halların qarşısının alınması üçün kompleks tədbirlərə ehtiyac var. Məktəblərdə psixoloq və sosial pedaqoqların rolu artırılmalı, valideynlərlə daha sıx əməkdaşlıq qurulmalı, hüquq-mühafizə orqanları isə profilaktik işləri sistemli və məqsədyönlü şəkildə həyata keçirməlidirlər. Həmçinin, gənclər arasında idmana, incəsənətə və digər sağlam fəaliyyətlərə marağın artırılması istiqamətində layihələr icra olunmalıdır.

Unutmayaq ki, sağlam və vətənpərvər gənclik yalnız düzgün tərbiyə mühitində formalaşır. Gəlin, bu məsuliyyəti birlikdə daşıyaq.

Ceyhun Əliyev