Yaz mövsümündə yağan intensiv yağışlar Gəncə şəhərində ciddi fəsadlara səbəb olub. Gəncəçayda suyun səviyyəsinin kəskin şəkildə artması nəticəsində sel suları M.Bürcəliyev küçəsində yolun bir hissəsini yuyub və ərazidə təhlükəli vəziyyət yaradıb.

Hadisədən dərhal sonra Gəncə Şəhər İcra Hakimiyyətinin başçısı Niyazi Bayramov aidiyyəti qurum rəhbərləri ilə birgə M.Bürcəliyev küçəsinə baxış keçirib. Yerində aparılan müşahidələr zamanı yaranmış vəziyyətin ciddiliyi qiymətləndirilib, əhalinin təhlükəsizliyinin təmin olunması və zərərin aradan qaldırılması məqsədilə müvafiq tapşırıqlar verilib.

İcra başçısı aidiyyəti üzrə qurumlara operativ tədbirlərin görülməsi, yolun bərpası və sel sularına qarşı qoruyucu infrastrukturların gücləndirilməsi ilə bağlı göstərişlər verib. Eyni zamanda gələcəkdə bu kimi halların qarşısının alınması üçün qabaqlayıcı tədbirlərin hazırlanması tövsiyə olunub.

Hazırda ərazidə bərpa işlərinin aparılması üçün hazırlıqlara başlanılıb. Şəhər sakinlərindən isə təhlükəsizlik qaydalarına riayət etmələri və baş verə biləcək fövqəladə hallarla bağlı diqqətli olmaları xahiş olunur.

@Patriot News.az