23 aprel 2025-ci il tarixində Fövqəladə Hallar Nazirliyinin Mülki Müdafiə Qoşunlarının Gəncə şəhərində yerləşən N saylı hərbi hissəsində “Şahin” hərbi-idman oyununun VIII zona mərhələsi keçirilib.

Patriot News . az xəbər verir ki, Azərbaycan Respublikasının Gənclər və İdman Nazirliyi, Müdafiə Nazirliyi, Elm və Təhsil Nazirliyi, Fövqəladə Hallar Nazirliyi və Səfərbərlik və Hərbi Xidmətə Çağırış üzrə Dövlət Xidmətinin birgə təsdiqlədiyi Əsasnaməyə uyğun olaraq keçirilən yarışda Gəncə və Naftalan şəhərləri, Daşkəsən, Goranboy, Göygöl və Samux rayonlarının şəhər (rayon) mərhələsində qalib gəlmiş komandaları iştirak ediblər.

Tədbirdə çıxış edənlər “Şahin” hərbi-idman oyunlarının gənclərdə vətənpərvərlik hisslərinin aşılanması və hərbi xidmətə hazırlığın təşviq olunması baxımından əhəmiyyətini xüsusi vurğulayıblar.

Zona mərhələsinin yekununa əsasən, Samux rayonu üzrə ümumi təhsil müəssisələrinin şagirdlərindən ibarət “Samux” komandası birinci yerə layiq görülüb və “Şahin” hərbi-idman oyununun respublika final mərhələsində iştirak etmək hüququ qazanıb.