Fövqəladə Hallar Nazirliyinin Gəncə Regional Mərkəzinin təşkilatçılığı ilə hərbiləşdirilməmiş ərazi mülki müdafiə qüvvələri ilə xəbərdarlıq toplanışı üzrə təlim-məşq toplantısı keçirilib.

Patriot News . az xəbər verir ki, tədbirin məqsədi ərazi mülki müdafiə qüvvələrinin fövqəladə hallara operativ reaksiya vermə hazırlığı səviyyəsinin yoxlanılması, böhran vəziyyətlərində qarşılıqlı fəaliyyətin uzlaşdırılması, yanğınsöndürmə bacarıqlarının təkmilləşdirilməsi və şəxsi heyətə xəbərdarlıq toplanışı üzrə əməli vərdişlərin aşılanması olub.

Təlimdə Gəncə Şəhər Birləşmiş Xəstəxanasının bir qrup əməkdaşı da iştirak edib. İştirakçılar nəzəri biliklərlə yanaşı, praktiki tapşırıqları da yerinə yetirərək fövqəladə hallar zamanı düzgün davranış qaydalarını və effektiv fəaliyyət mexanizmlərini nümayiş etdiriblər.

Belə tədbirlər mülki müdafiə qüvvələrinin peşəkar hazırlığının artırılmasına və fövqəladə hallara qarşı mübarizədə effektivliyin təmin olunmasına mühüm töhfə verir.