Azərbaycan futbolunun əfsanəvi simalarından biri olan Kəpəz Futbol Klubu qarşıdan gələn mövsümə tamamilə yeni nəfəs və ambisiyalarla başlayır. Klub rəhbərliyi, xüsusilə İdarə Heyətinin sədri Namiq Qədirov, "Kəpəz"i köklü dəyişikliklərlə yenidən dirçəltmək və əvvəlki şöhrətinə qaytarmaq üçün qətiyyətlə hərəkətə keçib.

Patriot News.az xəbər verir ki, yeni mövsümdən etibarən klubda yalnız baş məşqçi dəyişməyəcək, eyni zamanda bir sıra digər kadr dəyişiklikləri də nəzərdə tutulur. İdarəetmə sistemi əsaslı şəkildə yenidən qurularaq müasir, çevik və səmərəli bir model tətbiq ediləcək. Klubun bəzi əməkdaşları ilə müqavilələrin yenilənməməsi bu dəyişikliklərin bir hissəsi kimi həyata keçirilir və məqsəd daha güclü və məqsədyönlü bir gələcək qurmaqdır.

Yeni rəhbərlik həmçinin yerli azarkeşlərin və futbolsevərlərin fikirlərini öyrənmək üçün onlarla mütəmadi olaraq görüşlər keçirməyi və ictimai rəyi nəzərə alaraq öz inkişaf konsepsiyalarını həyata keçirməyi planlaşdırır. Bu yanaşma həm azarkeşlərlə münasibətlərin möhkəmləndirilməsinə, həm də klubun gələcək strategiyasının daha uğurlu olmasına xidmət edəcək.

Bundan əlavə, yeni mövsümdə əgər Kəpəz öz meydanında deyil, başqa stadionda ev oyunlarını keçirməli olsa, rəhbərlik azarkeşlərin rahatlığı üçün nəqliyyat vasitələrinin ayrılması məsələsini də həll etməlidir. Bu, azarkeşlərin dəstəyinin davamlı olmasını təmin etmək və onların stadionlara rahat gediş-gəlişini təmin etmək baxımından vacib addım olacaq.

Namiq Qədirov bu islahatların yalnız klubun daxili strukturuna deyil, həm də azarkeşlərin və futbol ictimaiyyətinin gözləntilərinə cavab verəcəyinə əmindir. Onun rəhbərliyi altında Kəpəz FK, yeni dövrün başlanğıcını elan edir və daha yüksək zirvələri fəth etməyə hazırlaşır.

Müəllif:    Vaqif Səfəroğlu