Birinci Qarabağ müharibəsi Azərbaycanın müstəqilliyi və ərazi bütövlüyü uğrunda gedən ən qanlı və şanlı mübarizələrdən biridir. Bu savaşda minlərlə igid oğul düşmənə qarşı mərdliklə döyüşdü, şəhid oldu və ya qazi kimi tarixə yazıldı. Onlardan biri də peşəkar snayper kimi tanınan, döyüş meydanında və cəmiyyət içində igidliyi ilə seçilən Habil Mirzəyevdir.

Hərbi yolun başlanğıcı

Habil Mirzəyev hərbi təcrübəsini Sovet İttifaqı dövründə, Macarıstanda xidmət etdiyi illərdə qazanmışdır. O, həmin müddət ərzində snayper atıcılığı üzrə keçirilən yarışlarda dəfələrlə birinci yeri tutaraq bu sahədə yüksək peşəkarlığını sübut etmişdi. Bu bacarıq sonralar Qarabağ döyüşlərində onun ən güclü silahına çevrildi.

Döyüş yolu və qəhrəmanlıq nümunələri

Birinci Qarabağ müharibəsi başladıqda Habil Mirzəyev ön cəbhəyə yollanır. O, döyüş yoluna Ağdamdan başlayır və Gəncə bölüyünün tərkibində, komandir Nizami Babayevin rəhbərliyi ilə 33 nəfərlə birgə ilk döyüşlərə qatılır. Əvvəlcə Milli Qəhrəman Asif Məhərrəmovun (“Fred”) rəhbərlik etdiyi batalyona qoşulur, sonra isə snayper kimi dəqiqliyi və döyüş təcrübəsi nəzərə alınaraq müxtəlif istiqamətlərə göndərilir. O, bir neçə dəfə Milli Qəhrəman Allahverdi Bağırovun batalyonunda da döyüşlərə qatılır.

Habil Mirzəyev Naxçivanik, Pircamal, Şelli, Abdal Gülablı, Güllücə, Ərənzəmin və Ağbulaq kimi kəndlərin azad olunmasında snayper kimi xüsusi rol oynayıb. O, düşmənin gözləmədiyi mövqelərdən sərrast atəş açaraq həm döyüşçülərin həyatını qoruyur, həm də kəşfiyyat tapşırıqlarını uğurla yerinə yetirirdi.

1992-ci ilin avqust ayında o, Drombon və Cıldıran kəndlərinin düşməndən azad olunması əməliyyatlarında iştirak edib. Lakin həmin ilin sentyabrın 7-də, Cıldıran döyüşləri zamanı ağır yaralanır və dərhal hərbi hospitala təxliyyə olunur. Bu hadisə onun döyüş yolunda dönüş nöqtəsi olsa da, Habil Mirzəyev Vətənə xidmətini başqa sahələrdə davam etdirir.

İctimai fəaliyyət və vətənpərvərlik xidməti

Müharibədən sonra Habil Mirzəyev cəmiyyətin fəal üzvlərindən birinə çevrilmişdir. Hal-hazırda o, Qarabağ Qaziləri İctimai Birliyinin Gəncə şəhər filialının sədr müavini, eyni zamanda Ağsaqqallar Şurasının sədri vəzifələrində çalışır. Bu vəzifələrdə Habil Mirzəyev döyüş yoldaşlarının hüquqlarının qorunması, qazilərin sosial rifahının yaxşılaşdırılması və gənclərin vətənpərvərlik ruhunda tərbiyəsi istiqamətində mühüm işlər görür.

O, tez-tez məktəblərdə, universitetlərdə və ictimai tədbirlərdə çıxışlar edir, Qarabağ müharibəsinin acı gerçəkliklərini və qəhrəmanlıq salnamələrini gənc nəslə çatdırır. Onun fəaliyyəti nəticəsində bir çox gənc milli-mənəvi dəyərlərə daha sıx bağlanır və Vətənə sədaqətlə böyüyür.

Nəticə

Habil Mirzəyev təkcə snayper kimi döyüş meydanında deyil, həm də cəmiyyət içində – xüsusilə də gənclərin formalaşmasında – mühüm rol oynayan bir şəxsiyyətdir. Onun həyat yolu, döyüş əzmi və ictimai fəaliyyəti bu günün və gələcək nəsillərin örnək ala biləcəyi bir qəhrəmanlıq nümunəsidir.

Müəllif: Ceyhun Əliyev