Kəpəz futbol klubunda məşqçi dəyişikliyi artıq adi bir hala çevrilib. Hər mövsüm yeni ümidlər, yeni məşqçi ilə başlayan komanda, mövsümün ortasında və ya sonunda eyni ssenari ilə üzləşir: baş məşqçi yola salınır və komanda yenidən sıfırdan başlamalı olur. Bu dəfə isə diqqət mərkəzində Azər Bağırov var. Premyer Liqada Kəpəzin yerini qorumağı bacaran, komandanı çətin anlarda ayaqda saxlayan və hətta qələbə seriyası qazandıran Bağırov gözlənilmədən istefaya göndərildi.

Bəli, məhz Bağırovun rəhbərliyi dövründə Kəpəz mövsümdə ilk qələbələrini qazandı. Komandanın oyunu əvvəlki dövrlərlə müqayisədə nəzərəçarpacaq dərəcədə yaxşılaşdı, futbolçular arasında inam və motivasiya artdı. Oyun planında irəliləyişlər müşahidə olundu və azarkeşlər Kəpəzin yenidən yüksələcəyinə ümid etməyə başladılar.

Maraqlıdır, klub rəhbərliyini bu qərara vadar edən əsas səbəblər nələr idi? Bağırovun hansı keyfiyyətləri rəhbərliyi qane etmədi?

Bağırov çətin bir dönəmdə iş başına gəlmişdi. Komanda demək olar ki, Premyer Liqada son sırada yer alırdı və psixoloji baxımdan tükənmişdi. Onun rəhbərliyi dövründə isə futbolçular məşqçinin sisteminə uyğunlaşmağa, birlikdə və intizamlı şəkildə oynamağa başladılar. Klubun əsas futbolçuları artıq Bağırovun oyun fəlsəfəsini mənimsəmişdilər və bu, meydanda nəticələrə də təsirini göstərirdi.

Lakin görünür, rəhbərlik qələbələri davamlı görmək istəyirdi və daha çox gözləntiləri vardı. Onlar Bağırovun sisteminin komandanı daha yüksək pillələrə qaldıracağına kifayət qədər inanmadılar. Bu qərar, əslində, həm komandanın sabitliyini, həm də futbolçuların motivasiyasını zədələdi.

Təəssüf ki, futbolda belə qərarlar tez-tez emosiyalarla və qısamüddətli nəticələrə əsaslanır. Halbuki, futbolda uzunmüddətli uğur üçün məşqçiyə vaxt və etimad vacibdir. Hər məşqçi dəyişikliyi yaxşı nəticə gətirmir, xüsusilə də futbolçular artıq məşqçinin tələblərinə uyğunlaşmağa başladığı bir dövrdə.

Kəpəzin bu mövsümdə əldə etdiyi qələbələrin məhz Bağırovun rəhbərliyi dövrünə təsadüf etməsi, onun istefasını daha da anlaşılmaz və haqsız göstərir. Komandanın oyununda canlanma və qələbə ruhunun yaranması üçün əsas səbəbkar olan məşqçinin bu şəkildə yola salınması, həm rəhbərliyin futbol fəlsəfəsinə, həm də klubun gələcəyinə dair suallar yaradır.

Müəllif: Patriot News.az saytının idman müxbiri    Vaqif Səfəroğlu