Azərbaycanda su ehtiyatlarının davamlı və səmərəli idarə olunması istiqamətində mühüm addım atılıb. Azərbaycan Dövlət Su Ehtiyatları Agentliyinin Su və Meliorasiya Elmi Tədqiqat İnstitutu nəzdində yaradılan Təlim və İnnovasiyalar Mərkəzi (TİM) fəaliyyətə başlayıb. Yeni Mərkəz ölkədə bu sahədə çalışan insan resurslarının peşəkarlığını artırmaq və innovativ yanaşmaları tətbiq etməklə su idarəçiliyində keyfiyyətli dəyişikliklərə zəmin yaradacaq.

TİM-in əsas məqsədi ixtisaslı kadrların hazırlanması, mövcud kadrların bilik və bacarıqlarının təkmilləşdirilməsi, həmçinin sahəyə müasir texnologiya və metodların inteqrasiyasıdır. Mərkəz müasir tədris korpusu, hidrotexniki qurğularla təchiz edilmiş poliqon sahəsi və ekopark daxil olmaqla kompleks infrastruktura malikdir. Burada nəzəri və praktiki təlimlərin təşkili üçün bütün şərait yaradılıb.

Mərkəzdə təlim otaqları, laboratoriyalar, kitabxana, idman zalı və yataqxana fəaliyyət göstərir. Eyni vaxtda yüzlərlə iştirakçının tədris alması mümkündür ki, bu da genişmiqyaslı kadr hazırlığı üçün mühüm üstünlükdür.

2025-ci il ərzində Mərkəzdə su ehtiyatlarının idarə olunması, içməli suyun emalı, tullantı sularının idarəsi, iqlim dəyişikliklərinə uyğunlaşma və digər aktual mövzularda müxtəlif təlimlərin keçirilməsi planlaşdırılır. Bu təlimlər həm yerli, həm də beynəlxalq ekspertlərin iştirakı ilə təşkil olunacaq.

TİM-in yaxın perspektivdə ISO/IEC 17024 beynəlxalq standartı üzrə akkreditasiyadan keçməsi və İqtisadiyyat Nazirliyindən rəsmi təlim lisenziyası alması nəzərdə tutulur. Bu addımlar Mərkəzin fəaliyyətini daha da gücləndirəcək və regional səviyyədə nüfuzunu artıracaq.

Yeni yaradılmış Təlim və İnnovasiyalar Mərkəzi Azərbaycanın su idarəçiliyi sahəsindəki inkişafına mühüm töhfə verməklə yanaşı, ekoloji davamlılığa və iqlim dəyişikliklərinə qarşı dayanıqlı həllərin formalaşmasında da əsas platformalardan birinə çevriləcək.

@Patriot News.az